كلنا نعانوا من ازمة البطالة وقلة فرص العمل والافلاس الي مارين بيه لن الصراصير تعبت من السكن في جيوبنا ، واي شخص حتكلمه عن الظيفة حيتحول فجأة لأليسا ويغنيلك (يامرايتي) ، ويقولك ان الاوضاع مأساويه ومافي شغل ومافي دخل والدولة مش مهتمه بينا والافنجرز تعاركو وباتمان باع سوبرمان ولوووجان ماات واكشن يادوري يعرضولنا فيه مرتين باليوم ، اي ممكن تكون الامور متلخبطه والدوله من يومها مشغلتنا الطرشه لدرجة تحسها مرت بونا ، بس هدا كله مش مبرر انك تقعد في البيت وتستنى السماء تمطر فلوس لان جربتها قبلك ومامطرت غير ماء ، اليوم حنعطيك مجموعة مشاريع تقدر من خلالها توفر مصدر دخل وتنسى شي اسمه دوله وراتب وماتحتاج راس مال كبير، سكر الفيس واستأذن من حبيبتك الي معيشها في الوهم الان وركز معاي وشوف بودانك واسمع بعيونك افضل مشاريع ماتحتاج لرأس مال وتوفرلك مصدر دخل :

تنظيف المنازل :

طبعا لايخفى عليكم ان فكرة تشكيل فريق لتنظيف المنازل امر صار منتشر بشكل كبير وصارت فيه شركات تتنافس عليه ، وانت نفسك تقدر تنفذ المشروع هذا مع مجموعة من اصدقائك وتشترو المواد اللازمه وتصمموا صفحة على السوشيال ميديا الي هي بالانجليزي وسائل التواصل الاجتماعي ، ويصير شغلكم بالطلب وتوفروا مصدر دخل معقول دون تكلفة كبيرة ، كل الي محتاجينه تسويق ممتاز وكم تشك ..تشك صورة حلوا تنحط ليكم .

رعاية الاطفال :

تحذير هام هذا المشروع غير مناسب لاصحاب القلوب الضعيفه والبال الضيق والنفسيات والا حتلقى نفسك تلعب تشارلي وتنتحر او رامي واحد من الاطفال لأعلا مسافة تقدرها وتاخد فيه بطولة رمي الجلة .... لذلك انلزم التنويه.

نحكوا توا على المشروع هدا ،غير انك تحتاج ادوية مهدئه وعلاج نفسي ، الا انه مشروع ممتاز ومش شرط يكون عندك مكان للاطفال تقدر تخصص بيبي ستر للمنازل ، اي زي ماسمعت للمنازل ، طبعا لو خففت دمك وقلت توصلك ديلفري وطازة فأنت مكانك مش معانا مكانك مع الخليل كوميدي ، الخدمه هادي منتشرة في اوروبا وامريكا بشكل واسع تجي الحاضنه او الحاضن لباب بيتك يهتم بطفلك وبأكلها وملابسه لحد ماحضرت الاهل ينهو مشاويرهم واعمالهم وافراحهم واحزانهم ، واهم شي الامانه والاخلاق في الشغل هدا وفهمكم كافي .

 صناعة الطعام المنزلي والحلويات :

مشروع زي هذا صار منتشر بشكل كبير وناجح خصوصا مع الوقت والحرفية حتلقى نفسك تقدم في وجبات للمطاعم والفنادق تكلفة كبداية بسيطه بس ربحها ممتاز جدا.

تنسيق الحدائق والاشجار :

مشروع حلو محتاج لحرفية بس وساهل جدا وكثير من الناس الان صارت تشتغل في هذا المشروع  ونجح معاهم ، غير مكلف بالمرة غير ان يحتاج لشخص يكون فاهم بالتنسيق وتقليم الاشجار والاهتمام بالنبات والتزين.

الاهتمام بكبار السن والعجزة :

وهذا يحتاج لشخص عنده خلفية عن التمريض والاهتمام بيهم ، مشروع كويس وانساني وتوفر مساعدة كبيرة ليهم في امورهم المنزلية والصحية 

التجارة الالكترونية :

طبعا مجال كبير وممتاز لكن يحتاج لخبرة ومعرفة بمصطلح التجارة الالكترونية ، منها البيع والشراء على مواقع التجارة ،تقديم خدمات في مواقع مثل خمسات _ مستقل وغيرها....

او تجارة الفوركس وتداول العملة ، طبعا مع الوقت اثبتت التجارة الالكترونية انها انجح المشاريع الصغيرة والي توفر دخل ممتاز ، ولكن في ذات الوقت اكثر المشاريع فيها مخاطرة ومجازفة بسبب تعقيدها وكثرت التقيد فيها ، وفي لحظة تلقى روحك من هارون الرشيد والجواري ورزم الدنانير ، الي واقف قدام المرايا وتغني ( اه من ظلم الايام )

مطعم متنقل :

ممكن يكون اكتر مشروع مكلف مما ذكر بس ربحه ممتاز ويعتمد عليك وعلى شطارتك ، والفكرة انك تجيب سيارة كبيره ركاب وتحولها من داخل لمطعم بسيط لساندوتشات وقهاوي وعصاير وكل مرة تكون في منطقه تعرف فيها ازدحام سكاني واقبال .

غسيل السيارات :

طبعا الان انت فتحت عيونك وشرقت وقلت ( ماذا تخرط ايها الاسهول ) ، محطات غسيل السيارات مكلفة جدا وتحتاج مكان كبير وشغل كبير ، تمام معاك حق لكن هل فكرت ان محطة غسيل السيارات تجيك لحد البيت ، طبعا انت الان مليت وحتسكر وتقول (ماهذا البولشيت ) ، اي زي ماسمعت محطة الغسيل لعندك الفكرة تحتاج مجموعة شباب الادوت اللازمه  وتمشي لبيت صاحب السيارة وتنظفهاله ، وتخليها كأنها طالعه من محطة غسيل سيارات ، مشروع غير مكلف بالمرة ومربح لان كل شخص حيحتاج ان يغسل سيارته مرة او اتنين في الشهر على الاقل.

عدة مشاريع وافكار تقدر تستثمرها وتنفذها وتحولها الي مصادر دخل ليك ولغيرك الموضوع يحتاج بس اغلاق الفيس وغسل الوجه وركعتين صلاة والتوكل على الله لا اكتر ولا اقل ، اي نعم كل بداية صعبة بس متعة الوصول لخط النهاية وتجاوز الكل متعه مابعدها متعه ، ونقولك حكمه قديمه (محاولتك للصعود اعظم بكثير من انتظارك لأحدهم ان يرفعك ) والسلام ختام